Bæði ESB og Kína hafa sérstakan augastað á Íslandi vegna norðurslóða

Í seinustu viku gaf utanríkisstjóri ESB út formlega yfirlýsingu um vilja hins verðandi stórríkis Evrópu til að komast til áhrifa á norðurslóðum. Áhugi Kínverja hefur heldur ekki leynt sér. Bæði risaveldin hafa sérstakan áhuga á Íslandi af sömu ástæðu.

 

Það hefur hreint ekki farið leynt að bæði Kína og ESB þreifa nú ákaft fyrir sér um aðstöðu og aðkomu að norðurslóðum. S.l. föstudag sendi Catherine Ashton, utanríkisstjóri ESB, frá sér yfirlýsingu, þar sem kynnt var endurnýjuð stefna ESB í málefnum norðurslóða. Þar var áhersla á það lögð að með nýrri stefnumörkun væri ESB að sýna að því væri full alvara með áhuga sínum á þessu svæði. ESB hygðist leggja 80 milljarða evra til þessa verkefnis (engin smáupphæð!) og m.a. senda gervihnött á loft til eftirlits með svæðinu.

 

Ef litið er á landakortið má sjá að ESB á hvergi landfræðilega aðkomu að Norður Íshafinu. Ísland og Noregur standa utan ESB, einnig Grænland og Færeyjar, þótt þau heyri undir Danmörku, og Finnar eiga hvergi land að Íshafinu, en síðan tekur Rússland við. Það kemur því ekki á óvart að ESB ætlar að óska eftir viðræðum við Kanada, Ísland, Noreg, Rússland og Bandaríkin um málefni svæðisins og leita eftir því að fá áheyrnarfulltrúa á fundum Norðurskautsráðsins. Innlimun Íslands í ESB myndi að sjálfsögðu gjörbreyta aðstöðu ESB á norðurslóðum.

 

Það er mikill barnaskapur ef Íslendingar loka augunum fyrir því að áköf viðleitni Kínverja til að koma sér fyrir á stóru landsvæði á Norðausturlandi er mjög líklega tengd framtíðaráformum Kínverja á norðurslóðum. Þeir eru í nákvæmlega sömu klípunni og ESB að eiga hvergi landfræðilega aðkomu að Norður Íshafinu. Áhugi Kínverja á auðæfum norðurslóða og siglingaleiðinni norður fyrir Asíu og Evrópu hefur hins vegar ekki leynt sér eins og fram hefur komið í fréttum.

 

Það er varla unnt að hugsa sér skammsýnni og ömurlegri glæfrapólitík í utanríkismálum en einmitt þetta að játast undir að mestu risaveldi samtímans nái hér varanlegri bólfestu og eiga svo jafnvel á hættu í ófyrirsjáanlegri framtíð að þau færu að bítast um aðstöðuna hér á landi. - RA

Athugasemdir

[Elín Sigurðardóttir (IP-tala skráð) 10.7.2012 kl. 13:14]

Höfum við ekki haft ágæt samskipti við Grænlendinga og Norðmenn hingað til? Af hverju þurfa Kínverjar eða ESB allt í einu að vera milligöngumenn?

[Valdimar Samúelsson, 10.7.2012 kl. 20:28]

Þegar Kínverjar eru komnir með búsetu rétt hér eftir nokkur ár þ.e. ef þeir komast yfir landsvæði þá eru þeir virkir sem heimamenn. spurningin er hve margir eru hér nú þegar. Þeir munu sækja um borgararétt og fá hann síðan geta þeir keypt upp landið í smá skömmtum. Þetta er sorgleg staðreynd og ríkisstjórnir okkar hjálpa til. Við verðum að átta okkur á því að kínamenn eru ekki eins og aðrar þjóðir.